Bahthatpih dalam haté ulôn ka putôih, teutapi mantong tjit wéh-weuëh sabab kon mangat bak teu tinggai hudép mèwah di Riverdale, New York, dan teudjak hudép dalam rimba Atjèh sibagoë peumimpin gerilja. Bida antara hudép ulôn djinoë ngon hudép ukeuë njang teungoh teupeugot rantjana dumnan raja, han keumaih tapandang, peuseulala mata, han keumaih teupiké. Na padum uroë treuk jôh gohlom ulôn beurangkat, ulôn meuteumeung peutunjok nibak Po teuh Allah rot njang hana teusangka-sangka. Bak siuroë, teungoh ulôn djak-djak bak djalan Fifth Avenue di New York, ulôn tamong dalam saboh toko buku dan ulôn kalon buku Nietzsche (ahli falsafah Djerman), Also Sprache Zarathustra. Watèë ulôn puka buku njan teuhah laju bak saboh Bab deungon nan: "Peungeumbara". Ulôn beuët:
"Ulôn njoë sidroë peungeumbara dan ureueng ék glé ... Dan bahthat peuë nasib ulôn dan tudjuan hudép ulôn u keuë, handjeuët-han rôh djak-djak dan ék-u-glé: keuneuleuëh peungalaman djeuëb2 manusia njankeuh peuë njang geurasa keudroëgeuh. Masa ka liwat watèë hai2 njang keubeutulan mantong teudjadi ateuëh ulôn. Dan peuë lom njang mungkén teudjadi njang gohlom teudjadi ateuëh ulôn? Peuë njang meuriwang atawa meugisa keuneuleuëh u rumoh deungon ulôn, hana laén nibak droë ulôn, dan peuë njang meu-asai nibak ulôn, njang ka tréb meusipreuëk di nanggroë gob dalam matjam2 keudjadian dan keubeutulan. Saboh peukara treuk njang ulôn teupeuë: djinoë ulôn dong dikeuë gunong keuneuleuëh njang pajah ulôn ék, dan dikeuë saboh peukara njang ka tréb that geukeubah keu ulôn. Alah, djinoë ka trôk watèë ulôn bak rot-uëh ulôn njang puëh leupah-na! O Po lôn, djinoë ka ulôn peuphôn langkah djak sidroë khong hana soë peungon! Teutapi soë njang lagèë ulôn hana keumah pluëng dalam saboh kutika - watèë njang kheun bak gobnjan: 'Njoëkeuh barô phôn gata tadjak bak djalan keubeusaran! Putjak ngon tjring - banduwa njan djinoë ka meusaboh!'
"Gata akan tadjak bak djalan keubeusaran: peuë (Nanggroë) njang lawét njoë handjeuet tawoë dan paléng meubaja keu gata djinoë ka djeuët keu teumpat meusom keuseuneuleuëh.
"Gata akan tadjak bak djalan keubeusaran: djinoë njoë handjeuët-han peu beuhô gata sabab hana lé djalan rot surôt dilikôt-teuh.
"Gata akan tadjak bak djalan keubeusaran: disinöe hana soë njang ék seutot gata; hana soë njang ék tjuë-tjuë langkah peusaban-saban droë ngon gata. Uléh gaki gata ka geulhi keudroë rot uëh dilikôt gata, dan diateuëh njan ka meutuléh: 'Handjeuët liwat, mustahé!'
"Dan meunjo gata djinoë hana rijeun ngon ta ék u ateuëh, maka handjeuët-han ta tukri ék u ateuëh ngon ulèë-teuh: ngon peuë laén ta keumeung ék u ateuëh? Ngon ulèë droë-teuh dan djeuôh nibak haté teuh! Djinoë peuë njang baroë-kon paléng leumoh-leumbôt bak gata handjeuët-han djeuët keu kreuëh lagèë beusoë. Soë njang sabé got that leupah peutimang droë nibak sôsah-pajah, keuneuleuëh djeuët keu glak-geuh keu le that keuseunangan. Dumpeuë ta pudjoë njang peudjeuët ureuëng kreuëh dan kha. Hana ta pudjoë Nanggroë njang disinan djilé ië-susu dan ië-madu.
"Mangat deuh ta kalon leubèh djeuôh, handjeuët-han ta meureunoë bèk le that ta ngiëng ateuëh droë-teuh, teutapi ta ngiëng ho laén, beudjeuôh nibak droë-teuh: keukuatan lagèë njoë peureulèë keu djeuëp2 ureuëng njang ék-u-glé. Mangat djeuët ta kalon keuë ngon likôt djeuëp2 peukara, maka handjeuët-han ta ék u putjak, leubèh lambông nibak pat gata djinoë, hingga bintang2 droë-teuh pih tinggai dimijub gata.
"Peureulèë ta ék u putjak njang lambông, beudjeuët ta kalon droë-teuh dan bintang droë-teuh dimijub geutanjoë: njankeuh njang ulôn bôh nan putjak ulôn njang keuseuneuleuëh.
"Ka ulôn teupeuë nasib ulôn ... Ulôn ka keumah. Djinoë ka mulai ulôn hudép sidroë ta ngon.
"Alah, njoë laôt hitam njang seupôt-seupeuët, njang peunoh ngon keuseudéhan, njang pajah ulôn djeumeurang! Alah, laôt hitam njang peunoh ngon hai2 njang hana ta teupeuë dan meubaja that! Alah, teukeudi njang pajah langoë laôt! Hai laôt, bak gata-keuh djinoë ulôn dong dikeuë gunong njang paléng lambông, njang meutjukéh awan, njang handjeuët-han ulôn-ék; dikeuë peungeumbaraan njang paléng panjang njang wajéb ulôn peuphôn; keu tudjuan njan leubèh dilèë pajah ulôn trén leubèh lhôk dalam sakét, weuëh, baja dan udjeuën ië-mata sampoë lagèë ië-beuna. Meunankeuh Teukeudi Po keu ulôn. Insja Allah, ulôn ka keumah.
"Keu gata ulôn bri nasihat bèk tan peubuët laén nibak ta muprang. Keu gata ulôn bri nasihat bèk ta mita damè teutapi ta mita meunang. Buët gata njankeuh prang. Damè gata njankeuh meunang."
Narit njoë bak geulinjuëng ulôn sang lagèë geulanteuë teungoh tjot uroë, deungon kilat meublé-blé, njang peupeungeuh ban saboh dônja, lhôh rot-uëh njang mesti ulôn djak dan peugadoh bandum wéh-weuëh dan ragu2 njang mantong dalam haté ulôn. Lheuëh njan, dumpeuë ka deuh trang lagèë, lagèë hantom baroë-kon. Ulôn peunjum sang2 djeuëb krak narit njan tjit meusadja geutuléh keu ulôn. Hana djeuët ulôn peugah peurasaan ulôn leubèh trang nibak njan. Hana ulôn tjok peuneutôih peubuët peuë njang teukeumeung peubuët njoë deungon seunang haté. Ulôn tjok peuneutôih njan deungon haté njang peudéh dan geuhon lagèëna. Njoëkeuh saboh keuwadjéban seudjarah njang wajéb ulôn seu-ôn. Ka trôk watèë djeumba ulôn bak gulam atra njan. Masa ulôn ka trôk. Hanadjeuët ulôn surôt nibak keuwadjéban njoë! Bahthatpih ulôn na diblahdéh dônja dan tjit djitham lé sipai Djawa handjeuët woë u Nanggroë. Na siribèë boh alasan bèk pajah peubuët: ban si-ribèë boh alasan njan ulôn tulak! Hana djeuët ngui menurôt Quran, Sunnah dan éndatu.